care taker pm

حکومت اور اپوزیشن میں نگران وزیراعظم کے نام پر اتفاق ہوگیا

اسلام آباد (پاک نیوز) حکومت اور اپوزیشن کےدرمیان نگران وزیراعظم کے نام پر اتفاق کرلیا گیا ہے۔ ذرائع کے مطابق نگراں وزیراعظم کی تقرری پر حکومت اور اپوزیشن کے درمیان اتفاق کےبعد اب نگران وفاقی کابینہ پر بھی مشاورت جاری ہے۔

ذرائع کا کہنا ہےکہ وزیراعظم اور خورشید شاہ کے درمیان پنجاب، سندھ اور بلوچستان کی نگران وزرات اعلیٰ پر بھی مشاورت جاری ہے جب کہ مسلم لیگ (ن) نے پنجاب میں نگران وزیراعلیٰ کے لیے بھی پیپلزپارٹی سے رائے مانگی ہے۔

نگراں وزیراعظم کے معاملے پر جب نمائندہ جیونیوز نے اپوزیشن لیڈر خورشید شاہ سے سوال کیا کہ کیا نگراں وزیر اعظم چھوٹے صوبوں سے ہو گا؟ اس پر خورشید شاہ نےکہا کہ صوبے کا بتا دیا تو باقی کیا بچے گا۔ اپوزیشن لیڈر سے سوال کیا گیا کہ نگراں وزیراعظم کوئی خاتون ہو گی یا مرد ہوگا؟ اس پر خورشید شاہ نے جواب دیا کہ نگراں وزیراعظم کے لیے جنس کی پابندی نہیں دونوں ہوسکتے ہیں۔

خورشید شاہ سے سوال کیا گیا کہ نگراں وزیراعظم کے لیے میڈیا پر جو نام چل رہے ہیں کیا ان میں کوئی نام ہے؟ اس پر اپوزیشن لیڈر کا کہنا تھا کہ ضروری نہیں کہ جو نام فائنل ہورہا ہے اس کا میڈیا پربھی چرچا ہو۔ اپوزیشن لیڈر کا کہنا تھاکہ ہماری کوشش ہے کہ متفقہ طور پر غیر متنازعہ شخص کو وزیراعظم لگایا جائے، منگل کو وزیر اعظم سے ملاقات کے بعد نگراں وزیر اعظم کےنام کا اعلان کروں گا۔

اپنا تبصرہ بھیجیں

This site uses Akismet to reduce spam. Learn how your comment data is processed.